𝐁𝐀𝐔𝐂𝐀𝐔, 𝟐𝟎 𝐀𝐠𝐨𝐬𝐭𝐮 𝟐𝟎𝟐𝟔.

Estadu komemora Loron Nasionál FALINTIL ba dala 51 iha Foho Mate-Bian, Postu Administrativu Quelicai, Munisípiu Baucau.

Serimónia ne’e lidera diretamente husi S.E. Prezidente Repúblika no Komandante Supremu F-FDTL, 𝐉𝐨𝐬é 𝐌𝐚𝐧𝐮𝐞𝐥 𝐑𝐚𝐦𝐨𝐬-𝐇𝐨𝐫𝐭𝐚.

Tema ba komemorasaun ne’e mak; “𝐇𝐨𝐧𝐫𝐚 𝐌á𝐫𝐭𝐢𝐫𝐞𝐬, 𝐊𝐨𝐦𝐩𝐫𝐨𝐦𝐢𝐬𝐮 𝐡𝐨 𝐄𝐬𝐭𝐚𝐛𝐢𝐥𝐢𝐝𝐚𝐝𝐞 𝐧𝐨 𝐃𝐚𝐦𝐞.”

Mensajen husi S.E. Prezidente Repúblika, José Ramos-Horta, hateten; jerasaun ohin loron tenke onra legadu FALINTIL la’ós de’it ho sakrifísiu iha funu, maibé liuhusi Governasaun di’ak, Integridade, Respeitu ba instituisaun sira, no buka prosperidade ne’ebé hanesan ba ema hotu.

Nia fó hanoin katak; pás loloos ezije justisa sosiál, edukasaun, no protesaun ambientál.

Prezidente husu ba Timor-oan hotu atu transforma independénsia ne’ebé manán ho susar ba nasaun dezenvolvidu no inkluzivu, “iha ne’ebé la iha sidadaun ida mak husik hela iha kotuk”.

Husi Xefe Estadu-Maior Jenerál F-FDTL, Tenente-Jenerál 𝐃𝐨𝐦𝐢𝐧𝐠𝐨𝐬 𝐑𝐚𝐮𝐥 “𝐅𝐚𝐥𝐮𝐫 𝐑𝐚𝐭𝐞 𝐋𝐚𝐞𝐤”, Nia apela ba povu Timor-Leste atu kontinua hametin rekonsiliasaun, pás no estabilidade iha nasaun. Nia subliña katak; Foho Matebian sai símbolu no testemuñu ba korajen, sakrifísiu no determinasaun povu Timor-Leste iha luta ba independénsia. Nia hatutan, komemorasaun ne’e importante atu aprende husi istória, fó onra ba mártires no lutadór sira, no hametin kompromisu hamutuk hodi mantein pás, unidade no estabilidade nasionál.

Atividade ne’e, fó sentidu ba ita hotu nu’udar momentu importante atu homenajia luta no sakrifísiu FALINTIL iha Komemorasaun ba dala 51 nian hodi reafirma kompromisu atu fó honra memória mártires no veteranu sira, no kontinua promove unidade nasionál, estabilidade, dame no soberania Timor-Leste.

Komemorasaun ne’e partisipa mós husi membru Governu sira, entidades husi órgaun soberania Estadu, no lider Autoridade lokál sira, F-FDTL, PNTL no komunidade.

Fontes #Medi@MAE_2026