Viqueque, 30 Jullu 2026

Exelentisímu Prezidente Autoridade Munisípiu Sr. Francisco C.S de G. Soares, akompañia Sua Exelénsia Ministru Administrasaun Estatál (MAE), Tomás do Rosário Cabral, hamutuk ho Sua Exelénsia Ministru Justisa, Sr. Sérgio de Jesus F. da C. Hornai ho Ministra Saúde (MS), Sra. Élia A. A. dos Reis Amaral, ofisialmente inagura Edefísiu Balkaun Úniku Viqueque, lokaliza iha area Pemancar, Suku Caraubalo, Postu Viqueque Vila.

Iha intervensaun Exelentisímu PAM, reprezenta Autoridade no Povu Viqueque hato’o agradese ba IX Governu Konstitusionál, liu husi Ministériu Administrasaun Estatál (MAE) ba oportunidade ne’ebé fó ba Viqueque, liuhusi inagurasaun edefísiu BÚ bele hafasil komunidade sira hodi trata sira-nia dokumentus. Previloziu mós ba Viqueque iha faze preparasaun hodi hakat ba desentralizasaun no podér lokál.

Balkaun Úniku maka, sentru servisu iha nivél lokál hodi fó espasu ba sidadaun hotu atu asesu ba informasaun liuhusi Portal Munisipál nomós servisu atendimentu públiku sira. Hanesan fornesimentu Billeti Identidade, Pasaporte nomós Rejistu Kriminál.

Iha serimónia inagurasaun ne’e, Ministériu Administrasaun Estatál entrega kareta no motorizada ida ba BÚ Viqueque hodi fasilita servisu no atendimentu ofisiál Balkaun Úniku iha baze.

Entertantu Balkaun Úniku nu’udar programa projetu Ministériu Administrasaun Estatál, servisu hamutuk ho Programa Nasoens Unidas ba Dezenvolvimentu (PNUD/UNDP) iha Timor-Leste, ho objetivu atu hadi’a prestasaun servisu públiku, hodi hakbesik servisu governamentál ba komunidade.