Viqueque, 24 Agostu 2026

Segunda-feira ne’e, Exelentisímu Prezidente Autoridade Munisípiu Viqueque, Sr. Francisco C. S. de G. Soares, akompañia husi Komandante PNTL Munisípiu Viqueque, Sr. Euclides Belo, halo observasaun direta ba merkadu Mercida hafoin ekipa konjunta Autoridade Munisipál Viqueque muda sai no sobu baraka negosiante sira ne’ebé seidauk sai husi area merkadu tuan.

Maibé antes ne’e, ekipa konjunta re-kolokasaun vendedór halo ona sosializasaun, avizu no fó ona prazu ba sira to’o 23 agostu 2026, atu labele okupa tan merkadu antigu. Tanba iha 24 agostu 2026, hahu ona muda no sobu baraka sira.

Maske nune’e, Autoridade kontinua fasilita apoiu hodi muda sasan sira hanesan, roupa, kalen, kama no seluk tan. Iha loron hanesan transporta kedas vendedór ba sira-nia fatin, tan maioria negosiante sira mai husi suku no postu administrativu.

Entertantu Autoridade Munisipál Viqueque prepara ona kondisaun ida dignu ba vendedór sira hodi kontinua halo sira-nia negosiu hanesan iha Merkadu Olobay, kompleta ho sintina publiku, bee no fatin ba negosiu.

Rekezitu maka, Merkadu Olobay sai de’it fatin ba negosiu la’os fatin atu hela permanente.