Viqueque, 15 Maiu 2026

Estrutura Konsellu Koordenasaun Munisipál (KKM) hamutuk (40), kompostu Exelentisímu Prezidente Autoridade, Sekretáriu Munisipál na’in 3, Diretór Servisu Munisipál ho Delegasaun Territoriál, Administradór Postu Administrativu no Xefe Suku (Reprezentante Asembleia Postu Administrativu “ASPA”), aprova ona proposta lista prioridade Planu Investimentu Munisipál (PIM) hamutuk 47 no lista PNDS totál 71 ba tinan fiskál 2027.

Lista prioridade ne’ebé mai husi aspirasaun nivél aldeia, suku, postu administrativu hodi diskute no desidi prioridade kada postu liuhusi Asembleia Postu Administrativu ida-idak hodi sai prioridade munisípiu nian ho multisetorál atu responde ba nesesidade komunidade nian.

Iha intervensaun, Exelentisímu Prezidente Autoridade Munisípiu Sr. Francisco C.S de G. Soares, hanesan mós Prezidente KKM, fó motivasaun ba membru Konsellu Koordenasaun Munisipál nu’udar reprezentante povu atu servisu hamutuk ho integridade hodi servi povu no tau ses interese partidu ho grupu nian, liuhusi sorumutu KKM, sexta-feira ne’e iha salaun Laline AMV.

Durante sorumutu ne’e diriji husi Prezidente Autoridade hodi fó tempu ba Diretór Servisu Munisipál Planeamentu Dezenvolvimentu Integradu Munisipál (PDIM), Joaquim Fernandes ho Diretór Servisu Munisipál Planu Nasionál Dezenvolvimentu Suku (PNDS), Francisco Soares Varela.