@Atividade_Diária_PAM
Sua Exelénsia Prezidente Autoridade Munisípiu, Sr. Francisco C.S de Gonzaga Soares, enkoraza ba Autoridade sira hotu hamutuk hodi servi ba ema hotu la hare ba kor ga ras maibé nafatin servi ho fuan, hodi simu podér lokál iha futuru.
Intervensaun ne’e S.E PAM hato’o, bainhira partisipa iha eventu komemorasaun loron mundiál ba ema ho defisiénsia (dia 03 dezembru), ne’ebé tinan ne’e Raes Hadomi Timor Oan (RHTO) hamutuk ho Ministériu Solidariedade Sosiál no Inkluzaun koopera ho Autoridade Munisipál Viqueque tinan ne’e, komemora iha Viqueque.
Tema mundiál maka “Haburas Sosiedade Ne’ebé Inkluzivu ba Defisiénsia Hodi Avansa Progresu Sosiál” ho tema nasionál maka “Implementasaun PAN-EHD 2021-2030 no CRPD Iha Nivél Hotu-Hotu, Mak Xavi ba Timor-Leste Hodi Avansa Progresu Sosiál no Haburas Inkluzaun Defisiénsia”.
Programa ba eventu loron ohin, hahu ho misa agradesimentu iha igreja Parokia Nossa Senhora Imaculada da Conceição, remata misa kontinua ho marsa ba inkluzaun defisiénsia, rute hahu husi Igreija ba Jardim 59, Merkadu, Dom Jerimeas to’o Kampu Futeboll Viqueque. Hafoin ne’e kontinua ho sesaun serimoniál ne’ebé realiza iha salaun enkontru Parokia Nossa Senhora Imaculada da Conceição, Suku Caraubalo, Postu Viqueque-Vila.
Kobertura: Zeca Simões (Ofisiál Gabinete PAM).
