Viqueque, 19 Abril 2026, Exelénsia Prezidente Autoridade Munisípiu Sr. Francisco C.S de G. Soares, akompañia Sua Exelénsia Prezidente Repúblika Demokratika Timor-Leste, José Ramos Horta, Ministru Agrikultura Pekuária Peskas no Florestas, Marcos da Cruz, Visé Ministru Komérsiu Indústria, Augostu Junior nomós komitiva Prezidensiál, Halo lansamentu ba programa agrikóla kuda hare ne’ebé organiza husi grupu MBX no distribui mós nesesidade bazika ba familia kbiit naton ho ekipamentu desportivu ba juventude sira iha suku Maluru, postu administrativu Viqueque Villa.

Iha loron hanesan Prezidente Repúblika ho komitiva distribui mós nesesidade bazika komunidade sira no ekipamentu desportivu ba juventude sira, iha suku Macadique, postu administrativu Uatulari.

Kontinua viajem ba postu administrativu Uatucarbau hodi hasoru malu ho autoridade no komunidade hodi hala’o mós atividade hanesan distribuisaun nesesidade bazika no realiza mós atividade “Camping” iha area Irabere no jantar hamutuk ho komunidade, iha sede suku Irabin de Cima.

Entertantu vizita ne’e nu’udar komprimisu Prezidente Repúblika nian hodi hakbesik an ba komunidade no halo mós ajudu fraternidade umana ba komunidade sira ne’ebé kbiit naton no maluk sira ne’ebé ho kondisaun espesiál ka defisiente sira.