DILI, 24 janeiru 2022 (TATOLI)–Administradór munisípiu Viqueque, Januário Soares ‘Bolly’, informa, daudaun ne’e administrasaun munisipál halo hela esforsu hodi kompleta rekursu umanu ba diresaun sira, iha ámbitu implementasaun lei poder lokál dezentralizasaun administrativa.

“Preparasaun simu poder lokál dezentralizasaun administrativa finansa munisipál, ba ami-nia nia parte sei kompleta tan diresaun ne’ebé seidauk iha, maibé fazeadamente hahú hosi Liquiçá, Ermera no Aileu, hafoin munisípiu seluk,” Administradór hateten ba Agência TATOLI, via telefónika, segunda ne’e.

Preparasaun estrutura iha munisípiu Viqueque seidauk kompleta hotu, nune’e iha tinan ne’e sei prienxe estrutura iha munisípiu ne’ebé mamuk no sei loke vaga ba públiku hodi ema ne’ebé iha interese bele konkorre kompleta estrutura.

Rekursu umanu iha munisípiu Viqueque maka hanesan diresaun rekursu umanu, patrimóniu no lojístika, agrikultura, saúde, edukasaun, planeamentu, inklui sei kompleta diresaun seguransa alimentár no diresaun Sosiál.

Kona-ba lei podér lokál, Governu sentrál entrega kompeténsia ba autoridade lokál munisipál hodi jere programa no orsamentu ne’ebé haruka bá munisípiu.

“Hanesan mós daudaun munisípiu tenki hatama proposta ba Governu sentrál hodi hetan aprovasaun mak foin implementa programa. Nune’e, ho poder ida-ne’e maka dezentralizasaun ba munisípiu no orsamentu hodi munisípiu deside rasik planu saida maka atu implementa,” nia akresenta.

Difikuldade ida bainhira laiha poder lokál mak finansa munisipál labele la’o, no bainhira munisípiu implementa programa ida mak sei hasoru difikuldade no presiza nafatin apoiu hosi Governu sentrál.

“Karik Governu sentrál entrega  podér ne’e,  ami munisípiu hotu prontu implementa dezentralizasaun administrativa finansa munisipál iha ami idaidak ninia munisípiu rasik,” Administradór otimista.

Aleinde ne’e, munisípiu Viqueque iha ninia rekursu naturál ne’ebé sai potensiál liu maka hanesan setór agrikultór, fatin turizmu, no peska  ne’ebé rekursu hirak ne’e maka presiza dezenvolve, nune’e ba futuru munisípiu bele iha reseita própria.

“Investivementu sira ne’ebé la’o iha Viqueque maka setór agrikultura de’it, ne’ebé to’o ohin loron ita seidauk hatama reseita ba Estadu. Atu hatama reseita ba munisípiu foin maka kria diresaun   turizmu, enkuantu ba rekursu naturál seluk maka fatuk no rai henek tanba daudaun ema foti gratuita de’it, tanba ne’e ami sei halo regulamentu ida, nune’e bainhira ema foti rekurusu naturál tenki selu  hodi hatama reseita ba munisípiu,” nia dehan.