@Atividade_Diária_PAM
Viqueque, 26 Outubru 2025, Autoridade Munisipál Viqueque, selebra adezaun Timor-Leste sai nu’udar estadu membru Asosiasaun Nasaun Sudeste Aziátiku (ASEAN)liu husi asina deklarasaun admisaun husi Sua Exelénsia Primeiru Ministru, Kay Rala Xanana Gusmão, iha Sentru Konvensaun Kuala Lumpur, Malázia.
Ofisialmente deklara Timor-Leste sai nu’udar membru plenu ASEAN ba dala 11. Hodi festeza vitoria husi luta naruk ne’e, autoridade munisipál Viqueque, halibur veteranu, autoridade seguransa PNTL, autoridade lokál, lideransa komunitária, reprezentante partidu politiku asentu parlamentar, konfisaun relijiozu, estudante no funsionáriu hamutuk ho entidade sira hotu, hodi asiste direta diskursu Sua Exelénsia PM, iha areadór edifísiu Administrasaun Munisipál Viqueque.
Iha diskursu Exelénsia Prezidente Autoridade Munisipál afirma katak, adezaun Timor-Leste ba ASEAN la’os de’it rekoñesimentu diplomatiku maibé oportunidade ida hodi promove dezenvolvimentu iha nivél lokál.
Liuhusi ASEAN bele hadia kapasidade téknika iha area agrikultura, edukasaun, turismu no komersiu ne’ebé bele aprende esperiénsia husi membru ASEAN sira seluk iha area governasaun, inovasaun no sustentabilidade ekonomia lokál.
Eventu refere hetan mós animasaun husi banda nasionál ALCATRAZ hodi festeza no anima loron istóriku adezaun Timor-Leste ba ASEAN.
