Viqueque, 29 Janeiru 2026, Exelentisímu Xefe Gabinete, Sr. Luis Antonio da S. Soares, reprezenta Prezidente Autoridade Munisípiu (PAM) Sr. Francisco C.S de G. Soares, partisipa iha enkontru ne’ebé organiza husi Komisaun Instaladora Dioseze Viqueque.

Objetivu ba sorumutu loron ohin maka, hodi atualiza progresu servisu liga ba relatóriu fundu instalasaun dioseze husi seksaun angariasaun no estatutu rai.

Iha enkontru ne’e, Komisaun Instaladora ne’ebé lidera husi Padre Abel Soares Alves aprezenta katak, problema kona-ba rai laiha maibé hein de’it husi parte terras propriedades atu halo atribuisaun no bele justifika dokumentu legál ruma bele garante konstrusaun.

Liga ba orsamentu, oras ne’e seksaun angariasaun rekolla ona osan hamutuk $. 55 mil resin iha ona konta bankaria maibé kontribuisaun barak mak seidauk tama, tanba ne’e seksaun refere sei kontinua la’o hela ba kontribuisaun.

Enkontru ne’e, hetan partisipasaun husi Autoridade Munisípiu Lautem, Autoridade Seguransa (PNTL), Padre Parokia sira husi Viqueque, Lautem inklui Madre no sira seluk tan.

Kobertura: Ernesto Miguel (Ofisiál Gabinete PAM)