Viqueque, 17 Jullu 2026

Exelentisímu Prezidente Autoridade Munisípiu Viqueque, Sr. Francisco C.S. de G. Soares, sesta-feira ne’e, fó pose ba kargu xefia hamutuk na’in 56, kompostu husi Xefe Departamentu Servisu Munisipál 36 no Xefe Postu Administrativu 5 hamutuk na’in 20.

Iha serimónia pose ne’e, Prezidente Autoridade hato’o parabéns ba empozadu sira no husu ba dirijente sira atu servi ho responsabilidade hodi servisu ba estadu no povu ba konfiansa ne’ebé estadu oferese.

“Ohin ita hasoru malu iha fatin ida ne’e hodi kompleta ita-nia kuadrus Autoridade Munisípiu Viqueque nian. Signifika tomada de pose ida ne’e, la’os de’it serimónia formál atu simu kargu maibé komprimisu ofisiál atu servisu ho responsabilidade, integridade, lealdade ba estadu no povu”, PAM Viqueque hateten iha serimónia tomada pose iha salaun Administrasaun Munisipál Viqueque.

Prezidente Autoridade enkoraza ba empozadu sira, tenke sai ezemplu di’ak nu’udar lideransa, servisu ho etika professionál no tuir prinsípiu funsaun públiku nian ba konfiansa ne’ebé Governu fó ona.

“Ita tenke halo servisu ho transparansia, akuntabilidade, prioritiza ba interese públiku husi interese pesoál, hanesan ohin ita-boot sira-nia komprimisu klaru no perante iha Nai Maromak, Estadu, familia no povu nia oin hodi kompromete atu promove kultura servisu ne’ebé efisiente, disiplinadu no fó atendimentu di’ak ba komunidade, servisu ho laran no respeita ita-nia povu”, hatutan, Exelentisímu PAM.

Ne’e duni, susesu Autoridade Munisipál Viqueque depende ba unidade kolaborasaun entre kaudrus autoridade munisipál, dirijente, funsionáriu no parseiru sira hotu bele lori dezenvolvimentu mai Munisípiu Viqueque.

Serimónia pose ne’e hetan partisipasaun mós husi Diretór Jerál Dezenvolvimentu Lokál-MAE, Autoridade Munisipál Viqueque, Komandante PNTL Munisípiu Viqueque, Prezidente CCITL Viqueque, Konfisaun Relijiozu sira, Administradór Postu Administrativu, Funsionáriu no Familia empozadu sira.