Viqueque, 26 Outubru 2026

Exelentisímu PAM Viqueque, Sr. Francisco C. S. de G. Soares, hanesan mós Prezidente Konsellu fó pose ba membru Konsellu Munisipál Protesaun Sivil (KMPC) hamutuk 73 no ofisialmente aprova ona esbosu Estatutu KMPC ne’ebé pasa ho valór unanimidade husi membru konselu 52 ne’ebé prezente, segunda-feira, iha Salaun Laline, AMV.

Fó pose ba membru KMPC ne’e hanesan etapa importante ida atu hametin koordenasaun no kolaborasaun entre instituisaun sira iha área protesaun sivíl, liuliu atu asegura preparasaun, prevensaun no resposta ba situasaun emerjénsia no dezastre naturál ne’ebé bele akontese iha Munisípiu Viqueque.

Membru KMPC iha papél importante atu apoia esforsu autoridade kompetente sira hodi hametin sistema protesaun sivíl no promove partisipasaun ativa husi entidade hotu-hotu iha prevensaun no jestaun risku dezastre. Nune’e bele responde ho efisiente ba nesesidade komunidade nian iha situasaun emerjénsia.

Atividade ne’e organiza husi Servisu Munisipál Protesaun Sivíl no Jestaun Dezastre Naturais ne’ebé lidera husi Diretór Carlos Zeronimo.

Serimónia ne’e partisipa husi Autoridade Munisipál, Autoridade Seguransa, Reverendu Pé. Vigariu Parokia Nossa Senhora Imaculada da Conceição Viqueque, Diretór Servisu Munisipál no Delegasaun Territoriál, Lideransa Komunitária sira no Organizasaun Sosiedade Sivíl. Partisipasaun husi entidade sira-ne’e hatudu reprezentasaun husi instituisaun no parte relevante sira iha prosesu estabelesimentu Konsellu Munisipál Protesaun Sivil.