Viqueque, 12 Maiu 2026

Exelentisímu Prezidente Autoridade Munisípiu Sr. Francisco C.S de G. Soares, introdús politika no prosesu dalan ba desentralizasaun podér lokál ba lideransa komunitária no komunidade sira, tersa-feira ne’e, iha sede suku Maluru.

Objetivu husi programa refere atu sosializa informasaun ba komunidade oinsá atu iha koñesimentu kona-bá, saida maka desentralizasaun podér lokál, vantajen no desvantajen husi politika ne’e rasik ba partisipante sira.

Liuliu ba komunidade sira husi suku 4, Maluru, Uma Uain Craik, Fatudere no Uma Uain Leten. Tanba podér lokál mak prosesu ida atu transfere kompeténsia, responsabilidade, rekursu finanseiru no podér foti desizaun husi governu sentrál (nasionál) ba administrasaun lokál (munisípiu).

Vantajen husi desentralizasaun podér lokál maka habadak birokrasia servisu públiku no fó kbiit ba autoridade lokál atu jere sira-nia dezenvolvimentu rasik, liuliu bele responde imediatamente ba preokupasaun komunidade sira-nian.

Aleinde ne’e, fó mós espasu dialogu entre partisipante ho autoridade sira liga ba preokupasaun, sujestaun husi lideransa komunitária ho komunidade liga implementasaun programa sira iha baze, hanesan saúde, bee moos, agrikultura no seluk tan.

Programa ne’e nu’udar komprimisu Prezidente Autoridade Munisípiu atu hakbesik an ba Nia povu sira iha baze, reforsa koordenasaun entre autoridade ho komunidade no diskute prioridade dezenvolvimentu lokál tuir nesesidade komunidade sira-nian hodi prepara ba desentralizasaun podér lokál.

Entertantu marka prezensa iha sorumutu ne’e husi segundu Komandante PNTL Munisípiu Viqueque ho estrutura, Diretór no Xefe Departamentu Servisu Munisipál, Xefe Suku Maluru, Uma Uain Leten no reprezentante Xefe Suku Uma Uain Craik ho Fatudere, Konsellu suku no komunidade sira.