@Atividade_Diária_PAM
Viqueque, 16 Dezembru 2025, Sua Exelénsia Prezidente Autoridade Munisípiu, Sr. Francisco C. S. de G. Soares, partisipa iha serimónia distribuisaun sertifikadu ba formandu hamutuk 88 ne’ebé termina ona formasaun lian inglés durante fulan 3, hodi update ba sistema Work Ready Pool, tersa-feira ne’e, iha salaun Tera-Ime, Beloi Santa Cruz, Postu Viqueque-Vila.
Iha intervensaun S.E. PAM kongratula ba formandu sira ne’ebé remata ona sira-nia formasaun no nia mós enkoraza ba formandu atu labele to’o iha ne’e de’it, maibé nafatin buka atu aprende tan hodi dezenvolve di’ak liután abilidade iha lian inglés liu husi formasaun bele mós liu husi aplikasaun teknolojia sira.
Importante liu maka tenke pratika bebeik hodi koalia lian inglés no labele moe atu konversa, tanba sei iha prosesu lubuk ida hodi ba servisu iha Australia, maibé labele lakon esperansa ba mehi ne’ebé iha.
Nune’e, S.E. PAM sujere ba parte SEFOPE atu transparante iha prosesu rekrutamentu no tau prioridade ba kualidade abilidade ka skill ne’ebé kandidatu trabalhadór sira-nian.
Entertantu formasaun ne’e, Sekretáriu Estadu Formasaun Profesionál no Empregu (SEFOPE) fasilita ba kandidatura trabalhadór Australia ne’ebé laliu teste rekrutamentu PALM (Pacific Australia Labour Mobility) iha tinan 2023 hodi fó oportunidade ba sira bele dezenvolve di’ak liután kandidatu sira-nia abilidade iha lian inglés hodi prepara ba servisu iha Australia.
