Viqueque, 21 Janeiru 2026, Kuarta-feira ne’e, Sua Exelénsia Prezidente Autoridade Munisípiu, Sr. Francisco C. S. de Gonzaga Soares, konvoka enkontru urjente ho Diretór Servisu Munisipál Agua Saneamentu no Ambiente (SMASA) hamutuk ho Xefe Departamentu na’in 3, iha sala vizita PAM.
Objetivu husi sorumutu ne’e, hodi fó orientasaun trabalhu ba Diretór ho estrutura no funsiónariu sira relasióna ho servisu hirak ne’ebé delega ona ba diresaun relevante, hodi tau matan ba asuntu importante 3 hanesan asuntu bee, saneamentu no ambiente.
Liga ba asuntu saneamentu Prezidente Autoridade husu atu kontrolu ba saneamentu nian tanba oras ne’e, lixu ne’ebé soe arbiru iha dalan ninin no mota laran inklui animál sira ne’ebé husik livre (hanesan karau, bibi, kuda no seluk) iha kapitál munisípiu ne’ebé fó imajen ladi’ak no impaktu ba ema nia saúde no ambiente.
Nune’e S.E. PAM rekomenda atu halo sosializasaun kona-ba asuntu saneamentu, liuliu impaktu husi soe foer arbiru. Ne’e duni, atu kontrolu ambiente nafatin mos no saudavél Prezidente Autoridade orienta mós ba SMASA atu organiza atividade limpeza jerál minimu semana 1 dala 2 iha loron tersa-feira no sexta-feira ne’ebé involve direta funsiónariu sira tantu funsiónariu publiku, ajente no kazuais nomós halo kontrolu ba animál sira.
