Vizaun

  • Forte

Autoridade Munisipál Viqueque iha objetivu atu konsolida instituisaun administrasaun munisipál sira efisiente, ho governasaun di’ak, iha akuntabilidade, administrasaun ne’ebé transparente, no iha abilidade atu responde ba sidadaun sira-nia nesesidade. Munisípiu ida ne’ebé forte mós garante seguransa komunidade nian, estabilidade sosiál, no reziliénsia hasoru dezastre naturál sira, mudansa klimátika, no dezafiu ekonómiku sira.

  • Unidu

 Unidu reflete apresiasaun ba diversidade linguístika, kulturál no sosial hodi hametin Viqueque nia identidade úniku. Unidade signifika mós komunidade sira ne’ebé koezivu, iha ne’ebé grupu sosiál no idade oioin kolabora no servisu hamutuk ba bem-komún, promove solidariedade, dame, no rekonsiliasaun hodi dezenvolve Munisípiu Viqueque.

  • Inkluzivu

Signifika asegura oportunidade hanesan iha asesu ba servisu públiku ho kualidade iha edukasaun, saúde primaria, bee, saneamentu, estradas, no empregu ba sidadaun hotu-hotu, inklui feto, foin-sa’e, ema ho defisiénsia, no grupu vulnerável sira. Fo oportunidade ba ema hotu-hotu partisipa ativu iha dezenvolvimentu munisipál, la hó diskriminasaun.

  • Prósperu

Viqueque sei promove moris di’ak (prósperu) ba ema hotu liuhosi dezenvolvimentu sosio-ekonómiku ne’ebé justu, ekitativu, diversifikadu no sustentável, ne’ebé hetan apoiu hosi infraestrutura adekuada ba edukasaun, saúde, bee moos no saneamentu, transporte no komunikasaun. Moris diak sei suporta husi modernizasaun setor agrikultura no turizmu komunitariu, no indústria ki’ik sira, kria oportunidade empregu, hasa’e rendimentu família nian, no hasa’e padraun kualidade moris populasaun nian.

  • Sustentável

Dezenvolvimentu sustentável bazeia ba protesaun ambientál, utilizasaun responsável ba rekursu naturál sira (minerais, rai, bee, ai-laran, no tasi), no adaptasaun ba mudansa klimátika. Sustentabilidade mós signifika halo balansu ba kreximentu rurál no urbanu, kontinuidade ba servisu diak sira ezistente, hodi asegura katak progresu atuál la kompromete jerasaun sira iha futuru.

 

Misaun

  1. Sei promove fortalesimentu kapitál umanu no identidade kulturál Viqueque nian, liuhosi edukasaun inkluzivu no inovativu, promosaun saúde públika ne’ebe kualidade no asesivel, valorizasaun ba tradisaun lokál, inkluzasuan sosiál, juventude, desportu no patrimoniu, no enkoraja partisipasaun sidadaun sira iha dezenvolvimentu munisipál.
  2. Sei dezenvolve no haburas ekonomia komunitaria ida ne’ebé diversifikadu, kompetitivu no sustentável, valoriza produtu lokál sira, promove agrikultura moderna, peska no indústria ho eskala ki’ik no média, no kria oportunidade empregu no redimentu ne’ebé ekuitativu ba populasaun hotu.
  3. Sei dezenvolve no mellora infraestrutura báziku iha área urbana no rural sira ho forma ida ne’ebé ekuitativu, sustentável no reziliente, asegura mobilidade, komunikasaun, asesu dignu ba servisu públiku sira, no promove munisípiu ida ne’ebé seguru, ordenadu no ambientalmente ekilibradu liu husi asaun sira ne’ebé prezerva ambiente ba jerasaun sira tuir mai.
  4. Sei konsolida ga hametin governasaun lokál ida ne’ebé efikaz, transparensia, inkluzivu no kolaborativu, hametin kapasidade institusionál autoridade munisipál nian, promove prestasaun servisu públiku ne’ebe exelente, no asegura mekanizmu koordenasaun intersetoriál ne’ebé efetivu no parseria estratéjika sira ba dezenvolvimentu integradu munisípiu nian.
  5. Promove dezenvolvimentu munisípiu ne’ebe konsidera ba igualdade jéneru no inkluzaun sosiál, liuhosi jestaun públika ne’ebé justu, servisu ne’ebé lais no asesivel, oportunidade ne’ebé ekitativu no kria ambiente ne’ebé seguru no akollidu ba feto, labarik, no grupu vulnerável sira.