@Atividade_Diária_PAM
Viqueque, 15 Dezembru 2025, Sua Exelénsia Prezidente Autoridade Munisípiu Viqueque, Sr. Francisco C.S de Gonzaga Soares, ofisiálmente abertura ba atividade avaliasaun kondisaun mínimu husi Diresaun Jerál Desentralizasaun Governu Lokál-Ministériu Administrasaun Estatál (MAE)ba autoridade munisipál Viqueque.
Avaliasaun ne’e realiza bazeia ba despaixu nú. 48/M-MAE/XII/2025, kona ba “criação a comissão coordenadora das atividades de avaliação das condições minimas nos Municipios e as equipas municipais de avaliação das condições minimas”
Objetivu husi sorumutu ne’e, hodi avalia kapasidade administrativa no finanseira ho pontu prinsipál 3 maka, halo diagnóstiku ba pontu fraku, forte no identifika nesesidade nesesariu munisípiu sira ba preparasaun desentralizasaun podér lokál.
Hafoin abertura iha salaun Laline, ekipa avaliadór MAE ne’ebé lidera husi Diretór Jerál Sekretariadu Tékniku Administrasaun Eleitorál (STAE), Sr. Elviro Fernandes Moniz, kontinua kedas halo avaliasaun ba kada diresaun servisu munisipál, iha salaun VIP-AMV.
Entertantu partisipa iha serimónia ne’e, kompostu husi Dirijente Nasionál MAE ho komitiva, Sekretáriu Servisu Munisipál, Xefe Gabinete PAM, Asesór, Diretór no Xefe Departamentu sira.
@Atividade_Diária_PAM
Viqueque, 12 Dezembru 2025, Sua Exelénsia Prezidente Autoridade Munisipál Viqueque Sr. Francisco C.S de Gonzaga Soares, hato’o agradese ba ekipa nasionál husi Ministériu Administrasaun Estatál (MAE), liu husi Diresaun Jerál- Dezenvolvimentu Governasaun Lokál (DG-DGL siglá portugés), ne’ebé mai ona dezimina informasaun durante loron 4 ba autoridade no funsionáriu sira.
Tanba liu husi formasaun bele ajuda munisípiu Viqueque prepara an ba desentralizasaun podér lokál no Prezidente Autoridade espera katak formasaun durante loron 2, bele ajuda servisu autoridade sira hodi foti desizaun, liuliu liga ho asuntu planeamentu no orsamentu.
Entertantu materia ba formasaun loron da-ruak nian foka liubá, Jestaun Projetu, Jestaun Aprovizionamentu, Jestaun Planeamentu no Finansas Munisipais nomós Monitorizasaun no Avaliasaun ba Dezenvolvimentu Administrasaun Lokál.
@Atividade_Diária_PAM
Sua Exelénsia Prezidente Autoridade Munisípiu (PAM) Sr. Francisco C.S. de Gonzaga Soares, husu ba diretór no kargu xefia sira atu partisipa maximu iha formasaun durante 2 nia laran, tanba materia sira ne’ebé sei partilla hanesan refreshing training ida ne’ebé bele ajuda kargu xefia sira hodi reforsa kapasidade funsionamentu hodi hala’o servisu, liuliu preparasaun ba simu desentralizasaun podér lokál iha munisípiu Viqueque.
Iha parte seluk, Prezidente Autoridade hato’o agradese ba ekipa husi nasionál, Ministériu Administrasaun Estatál (MAE), lidera husi Diretór Arkivu Nasionál Jestaun Dokumental ho Sistema Arkivu, Sr. Elizeu Angelo da Costa Soares, ne’ebé reprezenta DJ-DGL MAE hodi partilla informasaun ba kargu xefia sira, liu husi Nia diskursu iha serimónia abertura formasaun, kinta-feira ne’e, iha salaun Laline AMV.
Kona-bá “Formasaun Profisionál ba Kargu Xefia Hodi Reforsa Kapasidade Funsionamentu Servisu Lokál iha Nivél Munisipál no Kontribui ba Governasaun Ne’ebé Efetivu”.
Materia sira ne’ebé sei dezimina iha loron dahuluk mak hamutuk 6, hanesan, DL. Nú 33/2025, 15 Outubru alterasaun husi DL. Nú 3/2017, 22 marsu kona-ba, regime das zonas de estacionamento de duração limitada. DL. Nú 34/2025, 15 outubru alterasaun husi DL. 84/2023, 23 novembru kona-ba Estatuto das Autoridades Municipais e do Grupo Tecnico Interministerial para a Decentralização Administrativa. Jestaun Lideransa no Boa Governasaun, Jestaun Risku (Risk Management) no Problem Solving, Jestaun Administrasaun no Korrespondensia, Sistematika Prepara Minutas Enkontru/ Relatoriu no Jestaun Arkivu.
Viqueque, 10 Dezembru 2025
Kuarta-feira ne’e, Sua Exelénsia Prezidente Autoridade Munisipál (PAM) Sr. Francisco C.S de Gonzaga Soares, konvoka enkontru urjente ho estrutura autoridade munisipál, kompostu husi Sekretáriu Munisipál, Asesór PAM, Diretór no Xefe Departamentu sira.
Sorumutu ne’e realiza, iha salaun Laline AMV hodi diskute kona-bá preparativu sira liga avaliasaun kondisaun minimu ne’ebé sei akontese iha tempu badak nia laran husi ekipa avaliadór Ministériu Administrasaun Estatál (MAE).
Rezultadu husi avaliasaun ne’e, sai nu’udar rekezitu ida ba autoridade munisipál hodi hakat ba desentralizasaun podér lokál.
Viqueque, 10 Dezembru 2025
Kuarta-feira ne’e, Sua Exelénsia Prezidente Autoridade Munisipál (PAM) Sr. Francisco C.S de Gonzaga Soares, simu audiénsia husi ekipa MJDAK (Ministériu Joventude Desportu Arte no Kultura), ne’ebé lidera husi Diretór Jerál Desportu Sr. João R. M. Rodrigues.
Objetivu audiénsia ne’e, hodi fó koñesimentu ba Autoridade relasióna ho programa Festivál Nasionál Desportu (FND) nivél munisipál ne’ebé sei realiza iha tinan oin 2026. Nu’udar faze preparativu rekursu potensiál munisípiu nian hodi kompete iha eventu nivél nasionál no internasionál.
Relasióna ho informasaun ne’e S.E. PAM deklara katak, Autoridade prontu atu koopera no kolabora ho MJDAC hodi realiza eventu ne’e. Tanba liu husi eventu desportu bele fó oportunidade ba joventude feto ho mane sira hodi bele espresa talentu ne’ebé sira iha tuir modalidade desportivu ne’ebé iha.
Entertantu festivál desportiva ne’e rasik sei halo selesaun ba modalidade desportivu hanesan Futebol, Basketból, Volli Ból, badminton no atletismu.
Viqueque, 09 Dezembru 2025
Votasaun globál ba kapa, vizaun, misaun 5, pilár dezenvolvimentu 4 ho sub pilár 27, objetivu estratéjiku 32, estratejia 238 inklui programa asaun 250 ba Planu Dezenvolvimentu Munisipál tinan 5, pasa ho votu unanimidade ho vota afavór husi membru Konsellu Koordenasaun Munisipál 36.
Liu husi enkontru Konsellu Koordenasaun Munisipál (CCM siglá portugés) ba Deliberasaun Proposta Pré-limináriu ba Planu Dezenvolvimentu Munisipál (PDM) Viqueque 2026-2030, ne’ebé liu ona faze diskusaun téknika anteproposta, elaborasaun téknika, submisaun anteproposta, konvokatoriu konsellu konsultivu munisipál no konsultasaun públiku.
Iha sorumutu CCM ne’e, Prezidi husi Sua Exelénsia Prezidente Autoridade Munisípiu (PAM) Sr. Francisco C.S. de Gonzaga Soares, hanesan mós Prezidente Konsellu Konsultivu Munisipál.
Nia hato’o agradese ba parte hotu nia kontribuisaun no kolaborasaun hodi dezenvolve ona planu dezenvolvimentu munisípiu tuir kalendáriu ne’ebé iha no Nia enkoraza ba ekipa elaboradór sira atu kontinua esforsu hodi kompleta PDM ho kualidade.
Ne’e duni, S.E PAM apela ba autoridade sira hotu, atu kolabora ho ekipa elaboradór hodi submete dadus sira ne’ebé presiza hodi kompleta pilar importante 4, nune’e bele finaliza antes haruka ba nasionál, liu husi Ministériu Administrasaun Estatál (MAE).
Entertantu estrutura CCM kompostu husi PAM, Sekretáriu Munisipál na’in 3, Diretór Servisu Munisipál no Delegasaun Territoriál, Administradór Postu Administrativu, Xefe Suku Eleitu husi Asembleia Postu Administrativu 5.
Hetan partisipasaun mós husi ekipa tékniku husi nasionál ba elaborasaun PDM, Xefe Gabinete PAM, Asesór PAM, Xefe Departamentu no funsionáriu sira.
Viqueque, 08 Dezembru 2025
Sua Exelénsia Prezidente Autoridade Munisípiu Viqueque, Sr. Francisco C.S de Gonzaga Soares, hamutuk Autoridade Munisipál, Postu no Lideransa Komunitária sira partisipa iha selebrasaun misa aniversariu ezisténsia Parokia Nossa Senhora Imaculada da Conceicão ba dala 38, iha Igreja Parókia Imaculada da Conceição, Viqueque Villa.
Misa refere, prezidi husi Reverendu Padre Paróku Pe. Tomás de Aquino G.L da Cruz, hamutuk ho Pe. Vigariu no Amu Lulik Viqueque oan sira iha selebrasaun loron Padroeira Parokia nian.
Iha homilia Pe. Pároku haktuir katak, Nain Feto sarani sira hotu nia Inan, hodi selebra tinan 38 parokia realiza atividade vizita Inan Padroeira ba estasaun 23, durante loron 25 nia laran. Liu husi vizita ne’e, sarani sira hodi reza no husu tulun ba Na’in Feto ho Nia intersensaun tomak Nai Maromak bele haraik grasa no bensaun ba ida-idak nia presiza.
Hafoin misa remata, kontinua kedas ho serimónia koa keck, loke sampania no han hamutuk ho sarani sira iha areadór igreja nian, ne’ebé sarani husi grupu orasaun no estasaun sira prepara.
Nu’udar simbolu amizade no fraternidade umana hodi festeza loron Padroeira Parokia nian. Nune’e hetan mós animasaun dansa kulturál husi sarani sira.
Viqueque, 06 Dezembru 2025
Sua Exelénsia Prezidente Autoridade Munisípiu Viqueque, Sr. Francisco C.S de Gonzaga Soares, partisipa iha serimónia kolleta ikan iha lagoa We Ai Foun, ne’ebé administrativamente lokaliza iha suku Bahalarauain, Postu Administrativu Viqueque-Vila.
We Ai Foun hanesan sítiu turismu no kulturál ne’ebé koñesidu tebes iha munisípiu Viqueque ho kultura tara bandu ba atividade peskas iha area refere.
Molok to’o prazu tara bandu ba kolleta ne’ebé normalmente hala’o tinan 3 dala ida no sei loke ofisiálmente ba ema hotu tuir serimónia kulturál ne’ebé sei lidera husi Xefe Suku Bahalarauain, Uma Uain Craic no Uma Ki’ik.
Iha serimónia kolleta ikan We Ai Foun hetan partisipasaun mós Administradór Postu Administrativu Viqueque-Vila, Autoridade Seguransa PNTL no partisipasaun maximu husi komunidade sira.
@Atividade_Diária_PAM
Sua Exelénsia Prezidente Autoridade Munisípiu (PAM) Sr. Francisco C.S. de Gonzaga Soares, enkoraza emprezariu 74 ne’ebé sosa ona dokumentu pre-kualifikasaun liu husi servisu munisipál Aprovizionamentu, atu kolabora ho autoridade munisípiu no prepara kondisaun hotu liga ba rekezitu pre-kualifikasaun antes submete dokumentu sira. liu husi Nia diskursu abertura enkontru sosializasaun pre-kualifikasaun entre Autoridade ho Emprezariu sira, kuarta-feira ne’e, iha salaun Laline AMV.
Tanba iha 2026 Autoridade Munisípiu Viqueque sei loke konkursu públiku ba projetu Planeamentu Dezenvolvimentu Integradu Munisipál (PDIM) hamutuk 14.
Pre-kualifikasaun mak prosesu ida ne’ebé Komisaun Aprovizionamentu Munisipál (KAM) sei avalia administrativa no teknikamente hodi pré-kualifika empreza konkorente sira hodi bele partisipa iha konkursu públiku munisipál. Durante pre-kualifikasaun ekipa KAM sei pre-kualifika kompania ho kategoria A no B.
Kategoria A ezekusaun projetu ho valor to’o $. 150.000.00. dolar amerikanu no kategoria B ezekusaun projetu ho valor $. 150.000.00 to’o $.500.000.00 dolar amerikanu.
@Atividade_Diária_PAM
Sua Exelénsia Prezidente Autoridade Munisípiu (PAM) Sr. Francisco C.S. de Gonzaga Soares, ofisiálmente entrega premiu no sertifikadu ba grupu vensedór sira ne’ebé reprezenta munisípiu Viqueque partisipa iha Expozisaun Dezenvolvimentu Governasaun Lokál no Feira Nasionál nasionál ne’ebé organiza husi Ministériu Administrasaun Estatál (MAE), iha Tasi-Tolu, Dili.
Iha kompetisaun dansa Folklórika Viqueque hetan I lugar, simu sertifikadu apresiasaun ho $.2.000.00, II lugar, iha kompetisaun kulinária hetan sertifikadu ho $. 1.250.00 no III lugar iha kompetisaun produtu agrikola hetan sertifikadu apresiasaun no $.1000.00 dolar amerikanu.
Iha intervensaun S.E. PAM hato’o agradese ba grupu vensedór sira tanba hamorin ona Viqueque nia naran iha eventu nasionál no Nia enkoraza no motiva ba grupu sira atu kontinua hadia di’ak liután iha eventu sira ne’ebé tuir mai.
Entertantu eventu ne’e realiza, hodi komemora tinan 50 loron istóriku Proklamasaun Unilaterál Independénsia Repúblika Demokrátika Timor-Leste ho tema “𝐐𝐮𝐞 𝐚 𝐜𝐞𝐥𝐞𝐛𝐫𝐚𝐜̧𝐚̃𝐨 𝐝𝐞𝐬𝐭𝐞𝐬 𝟓𝟎 𝐚𝐧𝐨𝐬, 𝐝𝐨 𝐩𝐚𝐬𝐬𝐚𝐝𝐨, 𝐧𝐨𝐬 𝐚𝐬𝐬𝐞𝐠𝐮𝐫𝐞 𝐜𝐨𝐧𝐟𝐢𝐚𝐧𝐜̧𝐚 𝐧𝐨 𝐩𝐫𝐞𝐬𝐞𝐧𝐭𝐞 𝐞 𝐞𝐬𝐩𝐞𝐫𝐚𝐧𝐜̧𝐚 𝐧𝐨 𝐟𝐮𝐭𝐮𝐫𝐮”.
Liu husi eventu ne’e hanesan passu ida ba Autoridade Munisipál sira inklui Autoridade Administrativa Ataúro hodi promove potensialidade rekursu sira iha munisípiu nu’udar pasu preparativu ba desentralizasaun podér lokál.
© 2025 Viqueque Municipal Authority
