Viqueque, 27 Abril 2026, Asosiasaun Empresarial das Mulheres Timor-Leste (AEMTL) halibur grupu no individu emprezaria Viqueque inklui asosiasaun AEMTL territóriu munisípiu sira selebra aniversáriu ezisténsia ba dala-18 ho tema “Husi Munisípiu to’o Nasionál Feto Hamutuk Harii Negosiu no Harii Futuru Nasaun”, segunda-feira ne’e, iha salaun enkontru Terra Ime Furak, Beloi, suku Caraubalo.

Iha okaziaun ida ne’e Exelentisímu Prezidente Autoridade Munisípiu Sr. Francisco C.S de G. Soares, kongratula ba asosiasaun AEMTL nia selebrasaun loron anivérsariu hato’o mós nia votos susesu ba asosiasaun ne’ebé durante eziste hatudu ona komprimisu no fó kontribuisaun boot ba dezenvolvimentu ekonomia nasaun Timor-Leste.

“Feto emprezaria sira la’os de’it kontribui ba sustenta familia maibé mós sai motor importante ida ba kriasaun empregu, inovasaun no dinamizasaun ekonomia lokál. Ita hatene katak promosaun igualidade jeneru no inkluzaun ekonomika mak elementu importante ida hodi asegura dezenvolvimentu sustentavél.

Tanba ne’e presiza kontinua fó oportunidade hanesan ba feto no mane atu partisipa iha atividade ekonomika no desizaun importante sira”, haktuir PAM iha Nia diskursu.

Nu’udar governu lokál, Prezidente Autoridade reafirma nia komprimisu atu kontinua servisu hamutuk ho asosiasaun emprezaria feto Timor hodi fó apoiu iha area formasaun, asesu ba merkadu no fortalesementu kapasidade negosiu sira atu nune’e bele hasa’e produtividade lokál.

Nia mós enkoraza ba AEMTL atu kontinua firmi no forte iha lideransa, kreativu iha inovasaun no solidariu iha kolaborasaun hodi bele sai ezemplu ba feto joven sira iha futuru.