Viqueque, 27 Outubru 2026 — Autoridade Munisipál Viqueque selebra Loron Ai-han Mundial ba dala 81 nu’udar momentu importante atu hametin konsiénsia públika kona-bá importánsia seguransa ai-han, nutrisaun no valorizasaun produtu lokál.

Komemorasaun Loron Ai-han Mundial ba tinan 2026, realiza nivel mundiál ho tema “Inova ohin, fó han aban”, no iha nivel nasionál tema “Investe iha Inovasaun Atu Garante Seguransa Ai-han no Nutrisaun”. Tema hirak-ne’e subliña importánsia inovasaun, produsaun ai-han lokál no asesu ba ai-han ne’ebé sufisiente, seguru no nutritivu ba komunidade.

Loron Ai-han Mundial ne’ebé komemora kada 16 Outubru, sai oportunidade atu hametin kooperasaun entre autoridade lokál, instituisaun governu, agrikultór, sosiedade sivíl no komunidade, hodi buka solusaun ba dezafiu hamlaha, inseguransa ai-han no malnutrisaun, liuliu hasoru situasaun elninu (bailoron naruk).

Hodi komemora loron refere Komisaun Organizadora Munisípiu Viqueque, realiza atividade palestra, expozisaun produtu lokál no kompetisaun kulinaria produtu lokál ne’ebé ofisialmente abertura husi Exelentisímu Prezidente Autoridade Munisípiu Viqueque, Sr. Francisco C. S. de G. Soares, tersa-feira ne’e, iha edifisiu AMV.

“Ita labele koalia kona-bá siguransa aihan, sé ita la valoriza agrikultór no produtu lokál sira. Ita labele hakarak ekonomia sai forte, sé ita la fó oportunidade ba produtu ne’ebé ita-nia komunidade prodús rasik, tan ne’e mai ita hamutuk valoriza produtu lokál, apoia agrikultór sira no transforma sai fonte prosprieridade ba familia no jerasaun futuru Wekeke nian”, haktuir Exelentisímu PAM iha Nia diskursu abertura.

Nune’e, Nia husu ba parte hotu atu hamutuk kombate mal nutrisaun, liuliu motiva foinsa’e sira atu kontinua valoriza setór agrikultura, liuliu oinsá sira bele hola parte direta iha to’os, natar, pekuaria no seluk tan, bele ajuda kresimentu ekonomia uma laran.

Tanba seguransa ai-han mak responsabilidade hamutuk. Ho kooperasaun entre autoridade lokál, instituisaun relevante no komunidade, Viqueque bele kontinua promove produsaun ai-han lokál, nutrisaun di’ak no moris saudavel ba jerasaun ohin no aban.