Atividade_Diária_PAM
Viqueque, 05 Outubru 2025, Exelentísimu Prezidente Autoridade Munisipál, Sr. Francisco C.S de Gonzaga Soares, hamutuk ho Sua Exelénsia Primeir Ministru (PM), Sr. Kay Rala Xanana Gusmão ho Exelénsia Ministru Obras Públicas (MOP), Sr. Samuel Marçal, lansa fatuk dahuluk ba projetu rehabilitasaun estrada husi Raihun, suku Luca, postu administrativu Viqueque liga ba postu administrativu Lacluta ho medida kilómetru 14.
Nu’udar autoridade maximu munisipál Viqueque, Exelentísimu PAM hato’o bemvindu ba Xefe Governu S.E. Primeiru Ministru no Ministru Obras Publikas ho komitiva sira-nia prezensa hodi lansa ona projetu refere ba komunidade sira.
Tempu hanesan, Nia mós husu ba komunidade no autoridade sira labele halo impedimentu ba dezenvolvimentu ne’ebé mak governu inplementa no labele fó ameasa ba traballadór kompañia nian ne’ebé hala’o servisu iha terrenu. Atu nune’e labele prezudika ezekusaun projetu refere nune’e bele finaliza tuir kontratu ne’ebé iha.
Iha intervensaun Sua Exelénsia PM, Sr. Kay Rala Xanana Gusmão hateten, relasióna ho lansamentu estrada Lacluta ne’e devér Governu hodi kria kondisaun estrada sira ne’e ba povu, nune’e bele lori produtu ba fa’an iha merkadu. Primeiru Ministru mós sujere ba kompañia sira atu halo estrada ne’e ho di’ak no kualidade.
Nune’e Exelénsia MOP, Sr. Samuel Marçal, husu ba populasaun sira atu tau matan ba projetu ida ne’e, tanba projetu ne’e utiliza povu nia osan. Tan ne’e, kontratu asina direta iha povu sira-nian oin hodi povu mós bele sai sasin ba kontratu entre Governu ho empreza sira.
Entertantu projetu ho medida 14 kilómetru ho durasaun tinan 1 ne’e Governu asina ho kompañia 2. Hanesan ba rehabilitasaun pakote I, STA. O+000-STA 7+000 KM, Nú kontratu SSS/135/MOP-2025 ho $. 4.000.215.67 husi kompañia Kimberlie Kontrusaun Unipessoal.Lda. Bá pakote II, STA. 7+000 STA 13+922.67 KM ho númeru kontratu SSS/136/MOP-2025 ho $. 3.494.938.50 husi kompañia HOVEN II. UNIP. LDA.
Kobertura : Jeca Simões (Ofisiál Gabinete PAM)
