Viqueque, 14 Janeiru 2026
Exelentisimu Xefe Gabinete PAM, Sr. Luis Antonio da Silva Soares, reprezenta S.E. Prezidente Autoridade Munisípiu, Sr. Francisco C. S. de Gonjaga Soares, halo abertura ba enkontru avaliasaun ekipa Task Force End TB (moras Tuberkuloze) munisípiu Viqueque tinan 2025, iha edifísiu servisu munisipál Saúde.
Sorumutu refere, organiza husi servisu munisipál Saúde Viqueque hodi avalia kona-ba progresu no dezafiu sira liga ba implementasaun programa TB no re-estabelese fali ekipa Task Force End TB, iha munisípiu, postu, suku no aldeia.
End TB nu’udar programa multisektorál ne’ebé envolve entidade hotu, tantu autoridade munisípiu, seguransa no parte hotu nia responsabilidade hodi elimina ka kombate transmisaun virus tuberkuloze iha komunidade nia leet.
Iha intervensaun Exelentisimu Xefe Gabinete, hatete katak, liu husi avaliasaun espera bele halo mudansa ba dezafiu sira, nune’e bele servisu di’ak liután hodi atinji metas sira no Nia mós husu ekipa Task Force atu kontinua sensibiliza informasaun kona-ba moras TB ba komunidade nune’e bele reduz ka hamenus moras ne’e iha komunidade sira-nia leet.
Partisipa iha sorumutu ne’e kompostu husi autoridade munisípiu, Administradór Postu Administrativu, Xefe programa nasionál TB, Xefe sentru postu saúde, funsionáriu no pesoál saúde.
