DILI, 26 janeiru 2022 (TATOLI)—Diretór Servisu Edukasaun munisípiu Viqueque, Emidio Amaral, informa, konstrusaun eskola 18 iha Viqueque, ne’ebé Ministériu Edukasaun Juventude no Desportu (MEJD) entrega ba grupu komunitáriu, sei hahú iha fulan-fevereiru nia-laran.

“Ministériu transfere ona ba konta bankária grupu komunitáriu, ne’ebé konstrusaun sei hahú fulan oin, ho durasaun serbisu fulan-neen,” Diretór servisu munisipál ne’e hateten ba Agência TATOLI, liu telefónika, kuarta ne’e.

Aleinde ne’e, grupu komunitáriu preparadu ona no hein implementasaun projetu.

“Iha prosesu sei envolve mós xefe suku hamutuk ho komunidade responsavél ba konstrusaun. Tanba ne’e ha’u husu ba grupu responsavél sira tenki garante kualidade hodi uza infraestrutura ba tempu naruk,” nia akresenta.

Antes ne’e, grupu komunitáriu ne’ebé sei toma-konta ba konstrusaun eskola tuir ona formasaun téknika iha semana kotuk.

Nune’e, grupu ida-idak sei ba foti osan iha konta bankária hodi halo hahú obra. Iha munisípiu Viqueque sei konstrui eskola iha postu Viqueque villa, Ossu, Uatucarbau no Uatulari, ho kustu ba eskola 18 hamutuk $1.781.991,94.

“Ha’u haree iha postu Viqueque villa, Eskola Ensinu Báziku Sentrál Cabira-oan maka horiseik grupu sira sobu ona uma eskola tuan, maibé seidauk halo konstrusaun tanba sei hahú hotu iha fulan-fevereiru. Eskola Cabira-Oan hetan sala tolu ho montante orsamentu $52.836,14 ba,” nia dehan.