Sekretáriu Munisipál Asuntu Sosiais no Organizasaun Sosiál, Sr. Acacio de Sousa, reprezenta Exelentisimu Prezidente Autoridade Munisípiu Viqueque, Sr. Francisco C. S. de G. Soares, hato’o boas-vindas no agradese ba reprezentante MAE, SEI no CFP sira ne’ebé kolabora no konsege realiza semináriu GEDSI iha Munisípiu Viqueque.

Kona-bá asuntu Igualdade Jéneru, Defisiénsia no Inkluzaun Sosiál (GEDSI) ho tema “Promove Igualiade Jéneru no Papél Familia Kontribui ba Efetividade Funsaun Públika.

Atividade ne’e realiza iha salaun Laline AMV ho objetivu atu kontinua promove igualdade jéneru no inkluzaun sosiál iha servisu administrasaun públika, hametin komprensaun no promove aplikasaun prinsipiu igualidade jéneru, defisiénsia no inkluzaun sosiál iha instituisaun públika, hodi garante oportunidade hanesan ba feto no mane, inklui ema ho defisiénsia, iha asesu ba servisu no prosesu dezenvolvimentu nasionál no lokál.

Realizasaun semináriu ne’e sai hanesan oportunidade atu hametin koñesimentu no konsiénsia entre dirijente, funsionáriu públiku no reprezentante komunidade kona-bá importánsia igualidade, respeitu ba direitu umanu no inkluzaun sosiál iha implementasaun polítika no programa governamentál.

Liuhusi semináriu GEDSI ne’e, espera katak partisipante sira bele aumenta koñesimentu no komprensaun kona-bá igualidade jéneru, respeitu ba diversidade no inkluzaun sosiál, atu aplika prinsípiu sira-ne’e iha sira-nia servisu loroloron, liuliu iha administrasaun públika no prestasaun servisu ba komunidade.

Partisipante sira iha semináriu ne’e inklui dirijente MAE, reprezentante SEI no CFP, Sekretáriu Munisipál Viqueque, Padre Vigáriu Parókia Viqueque, kargu xefia sira ho sira-nia espoza/maridu, grupu asosiasaun feto, grupu ema ho defisiénsia, Administradór no Xefe Suku sira-nia espoza no funsionáriu sira.