Viqueque, 30 Julhu 2026

Projetu programa Planeamentu Dezenvolvimentu Integradu Munisipál (PDIM) tinan fiskál 2025 ba reabilitasaun Merkadu Olobai, ofisialmente inagura husi Sua Exelénsia Ministru Administrasaun Estatál (MAE) Sr. Tomás do Rosário Cabral, akompañia husi Membru IX Governu no Prezidente Autoridade Munisípiu Viqueque ho Autoridade sira, kinta-feira ne’e.

Hafoin inagura, Merkadu Olobai hetan bensaun husi Pe. Tomás de Aquino L. da Cruz, Paroku Igreja Nossa Senhora Imaculada da Conceição Viqueque.

Iha intervensaun, Exelentisímu Prezidente Autoridade Munisípiu Sr. Francisco C.S de G. Soares, hato’o agradese ba prezensa Membru IX Governu, liuhusi Sua Exelénsia Ministru Administrasaun Estatál, Sua Exelénsia Ministru Justisa, Sr. Sérgio de Jesus F. da C. Hornai, Sua Exelénsia Ministra Saúde (MS), Sra. Élia A. A. dos Reis Amaral ho komitiva hodi inagura ona Merkadu Olobai.

“Agradese ba Governu sentrál sira-nia prezensa, hatudu katak ida ne’e hanesan komprimisu IX Governu Konstituisionál atu lori dezenvolvimentu to’o iha baze agora ita hahu dadauk ona, ohin Exelénsia inagura ona no ami hatutan lori atende ami-nia povu”, haktuir PAM Viqueque.

Ne’e duni, Prezidente Autoridade Munisípiu mós husu ba komunidade no negosiante sira atu utiliza fasilidade sira ho responsabilidade, atu nune’e bele sai fatin negosiu, hasa’e rendimentu família nomós kontribui ba dezenvolvimentu ekonómia iha Munisípiu Viqueque.

Nune’e iha tempu badak Autoridade Munisípiu Viqueque, liuhusi Diresaun Servisu Munisipál Jestaun Merkadoria no Turismu ekipa Toponimia Munisipál, kompostu Autoridade Munisipál, Seguransa sei muda negosiante sira husi merkadu atuál ba merkadu foun Olobai.

Projetu Rehabilitasaun Merkadu Olobai ho Nú. Kontratu 1114/PAM/V/2025, konstrui husi kompañia lokál Viqueque, CANIELA UNIPESOAL.LDA ho Orsamentu Jerál Estadu (OJE) tinan fiskál 2025 ho totál $. 273,951.88.