Viqueque, 24 Abril 2026, Konsellu suku, estudante ho komunidade Suku Uaimori, Postu Administrativu Viqueque ho entuziasmu no kultura tara tais no tebedai simu Exelentisímu Prezidente Autoridade Munisípiu Sr. Francisco C.S de G. Soares ho komitiva iha vizita ofisiál Prezidente nian iha suku Uaimori, sexta-feira ne’e.

Hodi realiza atividade palestra kona-ba, “ Vantajen no Desvantajen husi Politika Desentralizasaun Podér Lokál”, ne’ebé aprezenta husi Prezidente Autoridade Munisípiu Viqueque.

Palestra ne’e rasik nu’udar programa planu asaun anuál Prezidente Autoridade nian hodi sosializa informasaun ba komunidade ho autoridade iha nivél suku.

“Ohin ami mai hakarak rona ita-boot sira-nia preokupasaun nomós provoka ita hotu atu bele iha hanoin ona katak Viqueque tenke hakat ba desentralizasaun podér lokál. Nune’e rekezitu maka tenke unidade, tenke iha estabilidade seguransa, tenke prepara no dezenvolve nia produtu lokál hodi bele sustenta ba an rasik”, haktuir PAM Viqueque.

Tanba podér lokál mak prosesu ida atu transfere kompeténsia, responsabilidade, rekursu finanseiru no podér foti desizaun husi governu sentrál (nasionál) ba administrasaun lokál (munisípiu).

Vantajen husi desentralizasaun podér lokál maka habadak birokrasia servisu públiku no fó kbiit ba autoridade lokál atu jere sira-nia dezenvolvimentu rasik, liuliu bele responde imediatamente ba preokupasaun komunidade sira-nian.

Entertantu programa ne’e nu’udar komprimisu Prezidente Autoridade Munisípiu atu hakbesik an ba Nia povu sira iha baze, reforsa koordenasaun entre autoridade ho komunidade no diskute prioridade dezenvolvimentu lokál tuir nesesidade komunidade sira-nian hodi prepara hakat ba desentralizasaun podér lokál.