@Atividade_Diária_PAM
Viqueque, 17 Novembru 2025, Sua Exelénsia Prezidente Autoridade Munisípiu (PAM) Sr. Francisco C.S. de Gonzaga Soares, ofisialmente abertura formasaun kona-bá Planeamentu, Monitorizasaun, Avaliasaun no Relatóriu” ba formandu hamutuk 51, kompostu husi dirijente no funsionariu sira, segunda-feira ne’e, iha salaun Laline Autoridade Munisipál Viqueque (AMV).
Iha intervensaun S.E. PAM hatete, rezultadu servisu susesu bainhira planu mós di’ak nune’e liu husi formasaun ida ne’e hanesan refresing training oinsá atu partilla fila fali formasaun liga ho planeamentu, monitorizasaun, avaliasaun no relatóriu. Tanba ne’e, kada diresaun hotu-hotu tenke hatene no domina ida-idak nia planu, nune’e labele fó implikasaun ba ezekusaun orsamentu munisípiu nian.
Formasaun refere realiza durante loron 5, husi dia 17 to’o 21, novembru 2025 ne’ebé organiza husi diresaun servisu munisipál Administrasaun Rekursu Umanu ba etapa daruak nian ho objetivu atu dezenvolve no hadia kapasidade rekursu umanu oinsá sira bele hala’o sira-nia servisu ho di’ak liután hodi atinji metas ne’ebé iha liga ba planeamentu, monitorizasaun, avaliasaun no relatóriu.
Entertantu formasaun ne’e bele realiza tanba koordenasaun servisu entre servisu munisipál Administrasaun Rekursu Umanu ho Diresaun Jerál Simplifikasaun no Modernizasaun Administrasaun Lokál (DG-SMAL siglá portugés), liu husi Diresaun Nasionál Formasaun no Kooperasaun- Ministeriu Administrasaun Estatál (MAE).
