Dili, 25 Juñu 2026
Exelentísimu Prezidente Autoridade Munisípiu Viqueque Sr. Francisco C.S de G. Soares hamutuk estrutura Autoridade Munisipál, Komandante PNTL Munisípiu Viqueque, Konsellu Veteranus, funsionáriu no komunidade reprezenta Munisípiu Viqueque presta omenajen ba Saudozu Sr. Dr. Francisco Guterres Lú-Olo, iha rezidénsia Farol-Dili.Saudozu hakotu ona Nia jornada moris iha loron 21 fulan juñu, iha Ospitál Prince Court, Kuala Lumpur, nasaun Malázia, hafoin halo tratamentu intensivu.Sr. Dr. Francisco Guterres “Lú-Olo” hanesan Viqueque oan, anteriormente asume kna’ar nu’udar Eis Prezidente Asembleia Konstituente, Eis Prezidente Parlamentu Nasionál, Eis Prezidente RDTL, Prezidente Partidu FRETILIN ho figura ida ne’ebé influénsia tebes iha prosesu luta libertasaun nasionál.
Viqueque, 24 Juñu 2026
Autoridade Munisipál Viqueque ho Konsellu Munisipál Kombatente Libertasaun Nasionál (CM-CLN siglá portugés) organiza misa requiem ba Saudozu Sr. Dr. Francisco Guterres Lú-Olo, iha Igreja Nossa Senhora Imaculada da Conceição, kuarta-feira ne’e.Misa refere prezidi husi Pe. Tomás de Aquino L. da Cruz, iha igreja Parokia Nossa Senhora Imaculada da Conceição, hodi hasa’e eukaristia no reza ba Saudozu ne’ebé hakotu ona Nia jornada moris iha loron 21 fulan juñu, iha Ospitál Prince Court, Kuala Lumpur, nasaun Malázia, hafoin halo tratamentu intensivu.Iha homilia Pé. selebrante husu ba foinsa’e ho estudante sira atu kontinua banati hahalok di’ak tomak ne’ebé saudozu husik hela, liuhusi simplidade, domin, dedikasaun no kontribuisaun hotu hahu husi rezisténsia to’o lori povu no Timor-Leste hetan liberdade.”Ba imi foinsa’e sira no estudante sira hakaas an estuda atu imi sai matenek ho matenek ida ne’ebé iha bele hodi nasaun no povu ida ne’e ba moris di’ak hanesan nasaun sira seluk iha mundu rai klaran. Haree husi ita-nia aman saudozu Dr. Francisco Guterres Lú-Olo Nia espiritu sakrifísiu, patriótizmu no nasionalismu ba nasaun Timor-Leste”, haktuir Padre iha-nia homilia.Liuhusi misa, Exelentisímu Prezidente Autoridade Munisípiu Sr. Francisco C.S de G. Soares, husu mós ba jerasaun foun sira atu kontinua banati ezemplu valor patriótizmu, servisu ba povu no espiritu lideransa ne’ebé husik hela husi saudozu.Misa ne’e partisipa mós husi Estrutura Autoridade Munisipál, Prezidente CM-CLN, Prezidente CCITL Viqueque, Segundu Komandante PNTL ho membru, sosiedade sivíl, funsionáriu, estudante no komunidade sira.
Prezidente Autoridade Munisípiu,Dirijente no Funsionáriu Tomak Autoridade Munisipál Viqueque hato’o sentidu profunda kondolénsia ba falesimentu saudozu Dr. Francisco Guterres “Lú-Olo” (1954-2026) Eis Prezidente Asembleia Konstituente, Eis Prezidente Parlamentu Nasionál, Eis Prezidente RDTL, Prezidente Partidu Fretilin no figura influénsia ba luta libertasaun nasionál.Ho triste no laran moras, ami hato’o kondolénsia klean ba família enlutada, kolega sira no povu Timor-Leste tomak kona-bá partida eterna husi ita-nia aman no líder nasionál, Dr. Francisco Guterres “Lu-Olo”.Ita lakon ema ida ne’ebé durante Nia moris dedika-an tomak ba luta libertasaun nasional, konsolidasaun demokrasia no dezenvolvimentu nasaun Timor-Leste. Nia kontribuisaun boot ba independénsia no unidade nasionál sei hela nafatin iha istória no memória povu Timor-Leste.Iha momentu ida-ne’e, ita hamutuk sente triste tanba lakon lidér ida ne’ebé hatudu komprimisiu, patriótizmu no servisu ba povu. Maske Nia fila ona ba Maromak Nia liman, nia legadu, valór no hanorin sira sei sai inspirasaun ba jerasaun agora no futuru.Nu’udar Prezidente Autoridade Munisípiu Viqueque no lori Autoridade Munisipál no Povu Viqueque nia naran, ha’u hato’o sentidu kondolénsia klean ba família no ema hotu ne’ebé senti lakon ida-ne’e. Ita hotu hamutuk rezá atu Maromak simu nia klamar no fó deskansu eternu ba Nia“Adeus Lidér Nasionál, Aman no Heroi ba Libertasaun Patria. Ita Ninia Dedikasaun, Servisu no Sakrifísiu Sei Nafatin Moris iha Ami Nia Fuan ”.
Deskansa iha Dame, Maun Lú Olo
Viqueque, 11 Juñu 2026
Comissão Nacional das Eleições (CNE) Munisípiu Viqueque realiza programa Edukasaun Sivíka ho modelu Talk Show ho tema “Estratéjia Partidu Polítiku ba Podér Lokál no Desentralizasaun Administrativa”, iha salaun Laline Autoridade Munisipál Viqueque.
Ba feto Partidu Polítiku 5 iha munisípiu Viqueque ne’ebé asentu Parlamentar hanesan, CNRT, FRETILIN, PD, KHUNTO no PLP, sai oradór prinsipál iha Talk Show hodi hato’o sira-nia perspetiva, komprimisu no estratéjia Partidu Polítiku wainhira implementa Desentralizasaun Administrativa no Podér Lokál iha Munisípiu Viqueque.
Liuliu kona-bá asuntu importante no prioridade balun ba implementasaun podér lokál hanesan, iha Setór Agrikultura, Dezenvolvimentu Ekonomia Lokál nomós Unidade.
Iha atividade ne’e, Exelentisímu Prezidente Autoridade Munisípiu Sr. Francisco C.S de G. Soares, partisipa hodi sai hanesan observadór prinsipál hodi hato’o observasaun ba perspetiva ne’ebé hato’o husi oradór sira.
Inklui mós Jerente AFVIQ Sra. Zulmira Fonseca, reprezentante Asosiasaun Feto Potensiál Munisípiu Viqueque hanesan mós observadora hodi hato’o pontu de vista relasióna ho aprezentasaun estratéjiku husi feto partidu politiku asentu Parlamentar.
Autoridade Munisípiu Viqueque,hakarak konvida emprezariu sira ne’ebé iha interese bele mai foti dokumentu tenderizasaun iha Edifísiu Administrasaun-Diresaun Servisu Munisipál Aprovizionamentu (SMA), Rua Beloi, Caraubalo, durante oras servisu.
Informasaun kompletu bele haree iha dokumentu, obrigada.
Viqueque, 08 Juñu 2026
Exelentisímu Prezidente Autoridade Munisípiu Sr. Francisco C.S de G. Soares, akompañia husi Diretór Servisu Munisipál PNDS, PDIM, Edukasaun, Obras Publikas no Patrimoniu Lojístika, APA Viqueque, reprezentante Komandante PNTL Viqueque, Veteranus, RHTO, Xefe Suku sira lansa fatuk da-huluk ba konstrusaun refeitóriu merenda eskolár EBC 04, 08 de Agostus Kaizu Laran, suku Bahalarauain, postu administrativu Viqueque.Nune’e ofisialmente lansa mós ba programa konstrusaun infraestrutura baziku PNDS 2026 hamutuk 77, iha suku 38 kompostu husi postu administrativu 5 (Ossu, Viqueque, Lacluta, Uatulari no Uatucarbau).Iha intervensaun Prezidente Autoridade esplika katak, “PNDS maka programa dezenvolvimentu ne’ebé besik liubá povu nune’e tenke aselera nia prosesu tanba programa ne’e maka povu bele sente dezenvolvimentu, hahu husi bairo laran kedas”.Ne’e duni, Nia husu ba ekipa PNDS atu aselera prosesu ezekusaun molok orsamentu fila fali kofre estadu, tanba orsamentu ne’ebé koloka la’os multianuál.Liuhusi biban ne’e, Prezidente Autoridade enkoraza no fó orientasaun ba ekipa PNDS atu kontinua monitoriza prosesu konstrusaun, hodi asegura katak materiál ne’ebé fornese husi fornesedór sira ho kualidade no bele finaliza tuir kontratu.Entertantu konstrusaun refeitóriu merenda eskolár, konstrui husi kompañia CANIELA UNIPESOAL.LDA ho medida 8×14, orsamentu alokadu $.14.000.00, durasaun ba konstrusaun fulan 3.
Fontes: MédiaPAM
Viqueque, 08 Juñu 2026
Segunda-feira ne’e, bazeia ba despaxu Prezidente Autoridade Munisípiu Sr. Francisco C.S de G. Soares, ba dirijente Autoridade Munisipál to’o Postu Administrativu, Suku, funsionáriu no Komunidade Jeralmente hodi kontinua hala’o limpeza jerál hodi asegura ambiente mós no saudavél.Iha ambitu komemorasaun semana Oseanu hodi selebra loron nasionál OSEANU ne’ebé monu iha dia 5 fulan juñu iha territóriu Timor-Leste.Atividade limpeza jerál ohin kontinua husi area Pemancar, Olobai suku Caraubalo ba to’o iha area Naeboruk juridikamente pertense ba suku Uma Uain Craik hodi dasa rai, tesi ai sira ne’ebé taka estrada no hamos sendimentu iha valeta laran.
Fontes: MédiaPAM
Viqueque, 07 Juñu 2026
Iha domingu hafoin akontesimentu erozaun iha tuku 7 liu minutu 30 dader, dezastre naturais erozaun ka rai halai iha foho Loibusu, suku Builo, postu administrativu Ossu, Exelentisímu Prezidente Autoridade Munisípiu, Sr. Francisco C.S de G. Soares, hamutuk ho ekipa Autoridade Munisipál observa direta komunidade afetadu iha fatin akontesimentu.Diskunfia iha erupsaun vulkániku no antisipa erozaun maka’as liután Prezidente Autoridade ho ekipa autoridade evakua kedas komunidade sira ne’ebé hela besik iha fatin akontesimentu ba suku villa provizoriamente.Loron hanesan mós Prezidente Autoridade komunika kedas ba parte APC iha nasionál no hetan intervensaun direta husi Prezidente Autoridade Protesaun Civil Sr. Jesuino dos Reis de Matos de Carvalho ho ekipa nasionál kalan ne’e to’o kedas iha terenu.Entertantu husi akontesimentu ne’e laiha komunidade ida maka sai vitima direta ka hetan estragus ba erozaun refere, husi totál uma kain 18 ho totál populasaun 90 itál.
Fontes: MédiaPAM
Viqueque, 05 Juñu 2026
Exelentisímu Prezidente Autoridade Munisípiu Sr. Francisco C.S de G. Soares, ofisialmente halo abertura kompetisaun desportivu MJDAC Cup 3 divizaun ba modalidade volli bola ba ekipa feto ho mane nivél munisípiu, ne’ebé organiza Asosiasaun Volli Bola munisípiu Viqueque.Programa ne’e, inisia husi IX Governu liuhusi Ministériu Juventude Desportu Arte Cultura (MJDAC) ho objetivu atu prepara atleta sira hodi kompete iha nivél rejionál to’o nasionál no internasionál.Iha intervensaun Prezidente Autoridade enkoraza ba membru ekipa volli bola atu prepara an hodi kompete iha kompetisaun ne’e. Liuliu hatudu ida-idak nia talentu, kapasidade, responsabilidade no unidade hodi bele lori vitoria ba sira-nia ekipa.”Ita tenke hatudu katak jogu sira ne’e saudavél, jogu sira ne’e hatudu espiritu iha unidade no responsabilidade. Ha’u mós espera katak, klubu sira ne’ebé kompete bele hatudu duni Viqueque oan nia karakter no reprezentante Viqueque ka seluk la let ida maibé ema ida de’it”, sita PAM nia intervensaun.Entertantu ba ekipa vensedór sei hetan premiu hanesan tuir mai ne’e, 1º lugar $.750.00, 2º lugar $.550.00, 3º lugar $. 400.00 no 4º lugar sei hetan bola volli 5. Premiu hirak ne’e hetan apoiu fundu husi MJDAC ba klubu 12 ne’ebé rejistu hanesan klubu feto 5 no mane 7.Partisipa iha serimónia ne’e kompostu husi Estrutura Autoridade Munisipál, Segundu Komandante PNTL Munisípiu Viqueque, Federasaun Volli Bola Nasionál, Prezidente CCITL, Pontu Fokál MJDAC no konvidadu sira seluk tan.
Fontes: MédiaPAM
Viqueque, 03 Juñu 2026
Exeléntisímu Prezidente Autoridade Munisípiu Sr. Francisco C.S de G. Soares, ofisialmente halo abertura ba atividade deziminisaun ne’ebé organiza husi Administrasaun Postu Administrativu Viqueque ba suku 3, Uma Uain Leten, Maluru no Fatudere.Objetivu husi atividade ne’e, atu partilla informasaun kona-bá desentralizasaun no podér lokál ba komunidade sira iha nivél. Fó mós espasu hodi rona preokupasaun komunidade sira-nian liga ba implementasaun servisu iha baze.Iha tempu hanesan, Exelentisímu Prezidente Autoridade sai mós hanesan oradór hodi aprezenta kona-bá Politika Desentralizasaun no Podér Lokál iha Munisípiu Viqueque.Okaziaun ne’e Exelentisímu PAM esplika, politika desentralizasaun podér lokál mai ho faze 3 molok munisípiu ida hakat ba desentralizasaun maka, faze preparasaun, faze tranzisaun no faze konsolidasaun, ne’ebé sai rekezitu fundamentál.Atualmente munisípiu sira iha ona faze tranzisaun liuhusi transformasaun governasaun sentrál mai munisípiu no entrega mós podér administrativu, finanseiru no patrimoniu lojistiku inklui servisu sektorál sira.Liuhusi biban ne’e mós Exelentisímu PAM subliña mós katak, unidade maka sai baze fundamentál hodi bele atinji mehi ba segundu faze libertasaun munisípiu Viqueque nian maka hakat ba desentralizasaun no podér lokál.Remata sensibilizasaun Prezidente Autoridade akompañia husi APA, Xefe Suku no Segundu Komandante PNTL munisípiu Viqueque hala’o vizita ba sentru formasaun lingua ingleza AHHA Education, Postu Saúde nomós Eskola EBC filial Uma Uain Leten hodi observa direta kondisaun fatin refere.
Fontes:Media PAM
© 2026 Autoridade Municipal de Viqueque
