Viqueque, 25 Maio 2026

Sekretáriu Munisipál Asuntu Administrasaun Finansas, Sr. Estevão de Carvalho, reprezenta Exelentisímu Prezidente Autoridade Munisípiu Sr. Francisco C.S de G. Soares, abertura sorumutu aprezentasaun relatóriu Avaliasaun Kondisaun Ezistente (AKE) no Avaliasaun Kondisaun Mínima (AKM), segunda-feira ne’e, iha salaun Edukasaun.

Atividade refere organiza husi Ministériu Administrasaun Estatál, liuhusi Diresaun Nasionál Promosaun Efisiénsia Administrasaun Lokál (DNPEAL) ne’ebé lidera husi Diretór, Sr. Agostinho da Costa ho ekipa.

Objetivu husi atividade ne’e, aprezenta rezultadu AKE no AKM ba desentralizasaun podér lokál ne’ebé hala’o husi MAE ba Autoridade Munisipál 12 inklui Autoridade Administrativu Atauro iha tinan 2025 liubá no entrega mós livru rezultadu avaliasaun ba Exelentisímu PAM, SEKAM na’in 3 no APA sira.

Nu’udar mós faze preparativu ba Autoridade Munisípiu Viqueque oinsá bele hadiak fila fali rekomendasaun sira hodi prepara ba avalisaun da-ruak ba desentralizasaun podér lokál, ne’ebé antes Viqueque hetan de’it valór bom husi Avaliasaun Kondisaun Mínimu ne’ebé realiza iha 2025.

Partisipa iha sorumutu ne’e kompostu husi Sekretáriu Munisipál, APA, Diretór Servisu Munisipál no funsiónariu sira.