Viqueque, 22 Maiu 2026

Proposta PAA, PIM no PNDS tinan 2027 ne’ebé aprezenta husi Autoridade Munisipál ba orgaun konsultativu munisipál pasa ho votasaun maioria a favor husi membru inerente Conselho Consultivo Municipal (CCM) 46 ne’ebé prezente, tanba proposta hirak ne’ebé aprezenta reflete tebes ba nesesidade no bem estar munisípiu nian, liuliu bem estar povu nian ne’ebé foku liubá setór agrikultura no reseita munisípiu, aleinde ne’e fó mós pose ba membru CCM sira.Hanesan proposta Planu Asaun Anuál Munisipál Viqueque (PAA) 2027 ne’ebé aprezenta husi Diretór Servisu Munisipál Ajénsia Planeamentu, Sr. Marcos Rangel pasa ho votu Afavor (44), Abstensaun (2), Kontra (0).Ba proposta Planu Investimentu Munisipál (PIM) 2027 liuhusi Fundu Kapitál Dezenvolvimentu ho projetu prioridade (48) ne’ebé aprezenta husi Diretór Servisu Munisipál PDIM, Sr. Joaquim Fernandes, pasa ho votu Afavor (43), Abstensaun (3), Kontra (0).Iha parte seluk proposta ba Programa Infraesturtura PNDS totál (71) ne’ebé nia prioridade akumulativu husi postu 5, suku 38 ne’ebé aprezenta husi Diretór Servisu Munisipál PNDS, Sr. Francisco S. Varela, pasa ho rezultadu votasaun unanimidade husi membru CCM (46). Husi rezultadu sorumutu CCM ne’ebé realiza iha salaun Laline Administrasaun Munisípiu Viqueque, Exelentisímu Prezidente Autoridade, hanesan mós Prezidente CCM, hato’o agradese ba membru CCM sira hotu ne’ebé fó ona votu afavor ba proposta prioridade munisípiu nian ba tinan 2027 no ba sujestaun konstrutivu sira. Nu’udar faze importante ida ba governasaun munisipál hodi kontinua hadia di’ak liután planeamentu, servisu públiku no programa dezenvolvimentu ba povu.Liuhusi sorumutu CCM ne’ebé realiza iha salaun Laline Administrasaun Munisípiu, sexta-feira ne’e, Exelentisímu Prezidente Autoridade mós husu membru CCM atu kontinua hametin unidade no komprimisu atu hamutuk hodi dezenvolve munisípiu Viqueque.”Husu ba membru Conselho Consultivo Municipal sira hotu atu kontinua hametin koordenasaun, unidade no esperitu servisu hamutuk ba povu, diferensia hanoin tenke sai forsa atu kompleta malu la’os haketak malu. Hametin nafatin valór responsabilidade, transparénsia no komprimisu atu hamutuk lori munisípiu ida ne’e ba dezenvolvimentu ida ne’ebé di’ak liután iha futuru”, haktuir Prezidente Autoridade Munisípiu Viqueque.Entertantu CCM maka orgaun ne’ebé ás liu iha autoridade munisípiu hodi fó paresér konstrutivu, observa no avalia ba planu asaun no servisu autoridade nian oinsá atu hadia di’ak liután. Membru CCM kompostu husi Prezidente Autoridade Munisípiu, Sekretáriu Munisipál na’in 3, Xefe Suku, Konfisaun Relijiozu, reprezentante Grupu Intelektuál ho Juventude feto mane, Veteranus, Sosiedade Sivíl, reprezentante Partidu Politiku asentu parlamentar no Setór Privadu.