Viqueque, 20 Janeiru 2026, Sua Exelénsia Prezidente Autoridade Munisípiu, Sr. Francisco C.S de G. Soares, konvoka enkontru emerjénsia ho Sekretariu Munisipál Asuntu Planeamentu Investimentu Dezenvolvimentu Integradu (PIDI), Xefe Gabinete, Asesór, Diretór Servisu Munisipál Obras Publikas, PDIM, SMASA, Jestaun Merkadoria no Turismu ho Diretór Delegasaun Territoriál BTL.Ep.
Liuhusi sorumutu ne’e, urjentemente hodi fó orientasaun traballu ba Diretór relevante sira.
Hanesan liga ba asuntu saneamentu iha Viqueque, tanba lixu sira komesa soe iha estrada ninin hodi fó impaktu ladi’ak ba imajen munisípiu no ema nia saúde. Inklui aproximasaun ligadu ba progresu projetu konstrusaun estrada foun ba fatin lixu.
Problema bee moos ne’ebé lasufisiente hodi fornese ba komunidade sira nomós asuntu merkadu ne’ebé sai preokupasaun Autoridade tanba negosiante sira hahu faan sasan iha trotoar leten bele hamosu pertubasaun ba transporte no risku ba komunidade la’o ain sira.
