Viqueque, 28 Janeiru 2026, Kuarta-feira ne’e, Autoridade Munisipál Viqueque hala’o sorumutu ho ekipa Avaliadór Kondisaun Minimu-Ministériu Administrasaun Estatál (MAE), ne’ebé lidera husi Diretór Nasionál Apoiu Administrasaun Suku Sr. Celestino Marques ho ekipa.
Liuhusi sorumutu ne’e hodi fó rezultadu Avaliasaun Kondisaun Minimu (AKM) Autoridade Munisipál no Autoridade Administrativu sira-nia preparasaun hodi hakat ba desentralizasaun podér lokál, ne’ebé hala’o tiha ona iha tinan kotuk (2025).
Sorumutu ba loron ohin nian ofisialmente abertura husi Exelénsia Prezidente Autoridade Munisípiu, Sr. Francisco C.S de G. Soares.
Iha Nia intervensaun hato’o agradese ba ekipa avaliadór MAE tanba bele ona mai partilla informasaun ba Autoridade munisípiu, postu no lideransa komunitaria sira relasióna ho rezultadu avaliasaun preliminariu kondisaun minimu Viqueque nian ne’ebé foku asuntu importante 3, atinjimentu, pontu fraku no forte ho rezultadu avaliasaun “BOM”.
Ne’e duni, Prezidente Autoridade enkoraza ba Autoridade hotu atu servisu hamutuk hodi hadi’ak pontu fraku hirak ne’e no kontinua servisu hamutuk hodi servi povu no responde ba nesesidade povu ho efisiénsia no efikaz.
