Viqueque, kinta-feira, 07 Maiu 2026

Autoridade Munisipál Viqueque (AMV) liuhusi Diresaun Servisu Munisipál Ajénsia Planeamentu ho Servisu Munisipál Finansas, realiza enkontru mini Komisaun Revizaun Orsamentu (KRO) ne’ebé lidera husi Exelentisímu Prezidente Autoridade Munisípiu Sr. Francisco C.S de G. Soares, akompañia mós Sekretáriu Munisipál na’in 3 no Asesór Prezidente Autoridade.

Sorumutu mini KRO ne’e realiza iha salaun Laline AMV, hodi diskute kona-bá preparasaun proposta orsamentu munisipál tinan fiskál 2027 husi Gabinete PAM inklui Gabinete Sekretáriu Munisipál, Diresaun Servisu Munisipál (20) no Postu Administrativu 5 (Ossu, Viqueque, Lacluta, Uatulari no Uatucarbau).

Proposta hirak ne’e, sei submete ba Ministériu Administrasaun Estatál (MAE) hodi hetan paresér tékniku molok aprezenta ba Prezidente Komisaun Revizaun Orsamentu ho membru, ne’ebé lidera husi Sua Exelénsia Primeiru Ministru, Kay Rala Xanana Gusmão hodi halo revizaun no aprovasaun ba proposta orsamentu no Planu Asaun Anuál tinan fiskál 2027.

Iha diskusaun ne’e, atualiza mós kona-bá progresu ezekusaun Orsamentu Jerál Estadu (OJE) 2026 nian iha nivél munisípiu hodi garante transparénsia no akuntabilidade.

Entertantu sorumutu ne’e, partisipa husi Sekretáriu Munisipál Asuntu Administrasaun Finansas, Sekretáriu Planeamentu Investimentu no Dezenvolvimentu Integradu (PIDI), Sekretáriu Munisipál Asuntu Sosiais i Organizasaun, Xefe Gabinete PAM, Asesór sira, Diretór no Xefe Departamentu Servisu Munisipál, Administradór Postu Administrativu 5 ho funsiónariu sira.