Viqueque, 06 Maiu 2026

Exelentisímu Prezidente Autoridade Munisípiu (PAM) Sr. Francisco C.S. de G. Soares, ofisialmente halo abertura ba atividade koordenasaun no partisipasaun instituisionál ba konsulta publika kona-ba Orsamentu Jerál Estadu (OJE) 2027, ne’ebé realiza iha salaun Laline Autoridade Munisipál Viqueque (AMV).

Atividade ne’e organiza husi Ministériu Finansas (MF) liuhusi Diresaun Jerál Planeamentu no Orsamentu, envolve mós husi liña ministeriál sira hanesan, Ministériu Administrasaun Estatál (MAE), Ministériu Saúde, Ministériu Agrikultura Pekuária, Peskas no Florestas, Ministériu Obras Publikas (MOP) inklui EDTL, E.P no BTL, E.P, Ministériu Solidariedade Sosiál no Inkluzaun no Ministériu Turismu no Ambiente (MTA).

Objetivu maka atu haforsa no promove partisipasaun sidadaun sira hotu nivél autoridade munisipál, postu no lideransa komunitária sira. Inklui parte seguransa PNTL, veteranus, relijiozus, sosiedade sivíl, intelektuál, grupu feto, juventude no ema ho kondisaun espesiál, oinsá atu halibur hanoin no promove partisipasaun husi sidadaun sira kona-bá prosesu preparasaun planeamentu Orsamentu Jerál Estadu (OJE) 2027.

Iha intervensaun Exelentisímu Prezidente Autoridade hatete, konsulta sidadania maka espasu ida atu rona povu nia lian hodi hatene loloos preokupasaun no problema iha komunidade sira-nia leet no buka solusaun hamutuk. Governasaun ida di’ak labele la’o mesak presiza involvimentu ema hotu, liuliu komunidade sira ne’ebé direitamente sente impaktu husi programa no politika ne’ebé implementa.

“Iha oportunidade ida ne’e ha’u konvida ita hotu atu fó hanoin ho responsabilidade, respeita malu ho espiritu konstrutivu nune’e sujestaun no hanoin sira ne’ebé hato’o sei sai baze importante ba planeamentu no implementasaun programa sira iha munisípiu Viqueque” haktuir Prezidente Autoridade Munisípiu Viqueque.

Nune’e governu lokál kompromete atu kontinua hadia servisu públiku, reforsa transparénsia, promove dezenvolvimentu inkluzivu no asegura katak prioridade sira ne’ebé povu hakarak bele konsidera iha prosesu tomada desizaun.

“Ha’u mós hakarak enfatiza katak unidade no kooperasaun entre governu, lideransa lokál, juventude, grupu feto no komunidade tomak mak save prinsipál ba susesu dezenvolvimentu”, hatutan PAM Viqueque iha Nia intervensaun.

Entertantu faze konsultasaun sidadania hahu ho aprezentasaun prioridade sira husi reprezentante liña ministeriál, distribui kuesionariu no kria diskusaun grupu foku ka “Focus Grup Discution” (FGD). Hodi diskute kona-bá pilár importante 4 ba dezenvolvimentu munisipál hanesan, Governasaun no Servisu Públiku, Dezenvolvimentu Ekonomika. Dezenvolvimentu Sosiál no Dezenvolvimentu