Viqueque, 22 Abril 2026,

Sua Exelénsia Prezidente Autoridade Munisípiu Sr. Francisco C.S de G. Soares, partisipa serimónia despedida kona-ba termu entrega ba Komandante Polísia Nasionál Timor-Leste (PNTL) Munisípiu Viqueque sesante Superintendente Xefe António Rego Fernandes ba Komandante PNTL atuál Superintendente Xefe Euclides Belo, serimónia ne’e hala’o iha salaun Komandu PNTL Viqueque.

Iha intervensaun Prezidente Autoridade reprezenta autoridade no povu hato’o agradese ba dedikasaun tomak Komandante sesante Superintendente Xefe António R. Fernandes, servisu di’ak, sempre kolabora no iha komunikasaun di’ak ho autoridade hotu iha kualkér tempu durante tinan 2 ho balun husi 2024 to’o 2026.

PAM mós hatutan katak, durante prezensa Komandante PNTL sesante nian situasaun iha Viqueque la’o kontroladu no laiha problema boot ne’ebé fó impaktu ba instabilidade munisípiu nian.

Iha parte seluk Prezidente Autoridade kongratula no hato’o bemvindu ba komandante atuál Superintendente Xefe Euclides Belo espera katak ho Nia prezensa bele kontinua hatutan buat ne’ebé furak ona kona-ba asuntu seguransa husi Komandante sesante, liuliu mantein komunikasaun di’ak ho autoridade munisipál.

Liuhusi momentu oportunu ida ne’e mós Prezidente Autoridade informa katak, Autoridade Munisipál Viqueque iha ona planu tinan ne’e sei tau orsamentu hodi sosa motorizada ba Ofisiál Polisiamentu Suku (OPS) hodi halo atendimentu ba komunidade sira iha baze, tanba konsidera hanesan nesesidade urjente ne’ebé presija tau atensaun.

Antes remata PAM hato’o mós Nia mensajen dehan katak “Servisu Ita-nian

la’os de’it seguransa, maibé kontribui mós ba harmonia iha sosiedade. Tan ne’e halo servisu ho integridade no disiplina, serve komunidade ho respeitu no humildade, hametin korajen no unidade entre maluk sira kada loron maske ita uza uniforme, ita mós tenke lori laran ne’ebé di’ak iha kada pasu fó forsa no matenek hodi hala’o misaun di’ak, proteze vida no hametin dame”.