Viqueque, 23 Abril 2026

Unidade de Missão para o Combate ao Stunting (UNMICS) Servisu hamutuk ho parseiru dezenvovimentu UNICEF sosializa Planu Asaun Nasionál Multisetoriál ba Kombate Stunting (PANKOS) nivél rejionál ne’ebé envolve munisípiu 4, Baucau, Manatutu, Lautem no Viqueque, iha salaun Laline AMV.

Aleinde divulga informasaun kona-ba PANKOS ba parte interesadu sira atu nune’e bele apoia implementasaun ne’ebé koordenadu no aselera redusaun stunting iha Timor-Leste.

Hasa’e kompriensaun kona-ba objetivu PANKOS, pilár estratéjiku no mekanizmu implementasaun. Klarifika mós papél institusionál koordenasaun CONSSAN-TL ho UNMICS ne’ebé aprezenta husi Diretór Ezekutivu Sr. Joel Maria Pereira.

Iha fatin hanesan halo introdusaun mós husi parte UNICEF nian husi Dra. Ana Soares, kona-ba ferramentu Jestaun Koñesimentu inklui introdús dashboard no sistema akompañamentu, nu’udar mekanizmu monitorizasaun hodi akompañia implementasaun no progresu PANKOS iha nivél munisípiu no rejionál.

Prezidente Autoridade iha nia intervensaun hato’o agradese ba UNMICS ne’ebé hili ona Viqueque sai fatin ba sensibilizasaun PANKOS nivél rejionál hodi diskute kona-ba oinsá atu kombate problema nutrisaun ka stunting ba labarik sira iha futuru.

Koalia kona-ba komitmentu no prontidaun munisípiu sira-nian, PAM afirma katak Viqueque prontu atu kolabora hodi reforsa politika governu liuhusi UNMICS ne’ebé tutela iha Vise Primeiru Ministru Koordenadór Asuntu Sosiais hodi kombate redusaun porsentu stanting iha Timor-Leste.

Entertantu iha sensibilizasaun hetan partisipasaun husi Exelentisíma PAM Baucau, reprezentante PAM Manatutu, Lautem ho komitiva. Autoridade munisipál Viqueque kompostu husi Sekam sira, Diretór no Xefe Departamentu, APA, Asesór no parseiru dezenvolvimentu sira.