Ba implementasaun projetu Dezenvolvimentu Kapasidade Restaurasaun Florestál no Jestaun Sustentável iha Timor-Leste (2026–2033) ho subvensaun preve dolár amerikanu milaun 6 ne’ebé sei implementa iha munisípiu Baucau ho Manatuto nomós Programa Integradu Nutrisaun no Seguransa Alimentár, Alimentasaun Eskolár, Fortifikasaun Alimentár, Fortifikasaun Ai-han no Infraestrutura Eskolár sira (2026–2030) ho orsamentu dolar amerikanu millaun 7,2 sei implementa iha Munisípiu Baukau, Bobonaru, Manufahi, no Viqueque.

Objetivu projetu restaurasaun floresta ne’e, maka atu reforsa prevensaun ba degradasaun ambientál no promove rekuperasaun ekosistema florestál sira, liuhusi modernizasaun sentru viveiru nasionál, implementasaun programa reflorestasaun, nomós kapasitasaun instituisaun públika no komunidade lokál sira.

Entertantu objetivu programa nutrisaun no seguransa alimentár ne’e atu hadi’a kondisaun ai-han no nutrisaun eskolár liuhusi reforsa infraestrutura no ekipamentu dapur eskolár, implementa sistema jestaun no monitorizasaun, fortifikasaun ai-han, no mós promove kadeia fornesimentu bazeia ba produsaun agríkola lokál.